Ҫурла уйӑхӗн 2-мӗшнче Шупашкарта пурӑнакан 85 ҫулти кинемей палламан ҫынна пулӑшма ыйтса улталаннӑ.
Ватӑ ҫын банк картти ҫинчен мӑнукне укҫа куҫарса парас тенӗ. Ҫакна тума пӗлмен енне хӑйӗн ҫурчӗ умӗнчи подъезд патӗнче пӗр арҫынран пулӑшу ыйтнӑ. Лешӗ ют ҫын картти ҫинчен малтан хӑйне 40 пин тенкӗ куҫарса янӑ, кайран — кинемейӗн мӑнукӗ патне.
Кинемей укҫа ҫухалнине сиссен йӗрке хуралҫисене пӗлтернӗ. Ватӑ ҫынна улталанӑ этем унччен судпа темиҫе хутчен те айӑпланнӑ 43 ҫулти арҫын пулнӑ иккен. Вӑрланӑ укҫана вӑл ҫав каҫах пӗтернӗ.
Арҫын тӗлӗшпе пуҫиле ӗҫс пуҫарнӑ.
Чӑваш Енре банк ӗҫченӗсем клиентсен счёчӗ ҫинчи укҫана вӑрланӑ.
Улатӑрта банксенчен пӗрин вырӑнти уйрӑмӗн клиенчӗсем хӑйсен счечӗсем ҫинчен пысӑках мар суммӑшар укҫана такамсене куҫарса панине сиснӗ. Ҫынсем пӑшӑрханма пуҫласан банк ертӳҫисем те сисчӗвленнӗ.
Тӗрӗслев ирттернӗ хыҫҫӑн банк уйрӑмӗнче ӗҫлекен икӗ хӗрарӑм ҫавӑн пек хӑтланни ҫиеле тухнӑ. Вӗсем ватӑрах ҫынсен счёчӗ ҫинчи укҫана пӗчӗкшерӗн вӑрланӑ. Икӗ ҫул хушшинче 70-е яхӑн ҫавӑн пек операци туса ирттернӗ, пӗтӗмпе 100 пин тенкӗ ытла вӑрланӑ.
Тӗпчеве Шалти ӗҫсен министерствин тата Федерацин хӑрушсӑрлӑх службин ӗҫченӗсем ирттереҫҫӗ. Преступление тупса палӑртнӑ вӑхӑтра малапрах асӑннӑ ҫав специалистсем банкра ӗҫлеме пӑрахнӑ-мӗн. Вӗсем тӑкака ҫийӗнчех саплаштарнӑ.
Ҫуллахи вӑхӑтра ялсенче ачасем скутерсемпе тата мопедсемпе ҫӳренине пирӗнтен кашниех курнах ӗнтӗ. Хулара йӗрке хуралҫисем пулсан та ун пеккисем тупӑнаҫҫӗ иккен.
Улатӑрти автоинспекци ӗҫченӗсем ҫамрӑк водительсене тӗрӗслеме рейд ирттернӗ. Мотоцикл умне ларнӑ 13-17 ҫулсенчи 8 ҫамрӑка асӑрханӑ. Вӗсенчен пӗри унччен те йӗрке хуралҫисен куҫӗ тӗлне пулнӑ-ха, пӗрех хальхинче те хула урамӗ тӑрӑх вӗҫтерсе пынӑ.
Патшалӑхӑн ҫул-йӗр хӑрушсӑрлӑхӗн инспекторӗсем пӗлтернӗ тӑрӑх, скутер, мопед, мотоцикл, квадроцикл умне ларма тӗрлӗ категориллӗ водитель прави кирлӗ.
Правасӑр яш-кӗрӗмпе хӗр-упраҫшӑн вӗсен ашшӗ-амӑшӗн явап тытма тивӗ. Водитель прависӑр ачана транспорт шанса панӑшӑн аслисене 30 пин тенкӗ штраф пама юрать.
Чӑваш Енӗн Шалти ӗҫсен министерстви полицин участокри уполномоченнӑйӗсене ӗҫ илесси пирки пӗлтерет.
Участковӑй пулса тӑрӑшас текен ҫыннӑн 18-55 ҫулсенче пулмалла. Уйӑхри вӑтам ӗҫ укҫи 50 пине яхӑн ларать-мӗн. Ҫулталӑкра 40 кун кантарӗҫ, унсӑр пуҫне 24 кун таран хушма кану кунӗсем пулӗҫ. Ӗҫленӗ вырӑнта пурӑнма кӗтес пулмасан ӑна тара илсе тӑкакланнӑшӑн пӗр пайне саплаштарӗҫ.
Тӗплӗнрех ыйтса пӗлес тесен 24-11-24 е 89997560998 телефон номерӗсемпе шӑнкӑравламалла.
Шупашкарта пӗр арҫын барта наркотик хутаҫҫине стойка ҫине кӑларса хунӑ. Ӑна йӗрке хуралҫисем тытса чарнӑ.
Росгвардин Чӑваш Енри управленийӗн пресс-службинче пӗлтернӗ тӑрӑх, Эгер бульварӗнчи спорт-барсенчен пӗринче пӑтӑрмах пирки асӑрхаттаракан кнопка ӗҫлесе кайнӑ. Вырӑнта йӗрке хуралҫисене ӑнлантарса панӑ тӑрӑх, пӗр арҫын бар стойки ҫине хӑйӗн япалисене кӑларса хунӑ, ҫав шутра шурӑ порошоклӑ пӗчӗк хутаҫ пулнӑ.
45-ри арҫынна полицине лартса кайнӑ. Экспертиза палӑртнӑ тӑрӑх, хутаҫра наркотик пулнӑ.
Ӗнер, авӑн уйӑхӗн 6-мӗшӗнче, Шупашкар районӗнчи Питтукассинче чикансен хушшинче ӑнланманлӑх сиксе тухнӑ. Йӑлари ыйтупа ҫыхӑннӑ тавлашу «ытлашши сурансемсӗр вӗҫленнӗ». Кун пирки «Ҫыхӑнура» форумра пӗлтернӗ.
Пӗр-пӗринпе ҫапӑҫма тытӑнса кайнисене йӗрке хуралҫисем илсе кайнӑ.
Ҫавӑн хыҫҫӑн Алькеша (унта чикансем йышлӑ пурӑнаҫҫӗ) полицин тата Росгварлин патрулӗсем пырса ҫитнӗ. Унта Росгвардин хӗҫ-пӑшаллӑ «Тигр» автомобилӗ те пулнӑ.
Шупашкар хулинче авӑн уйӑхӗн 2-мӗшӗнче пуҫтах пӗр водитель тепринпе ҫапӑҫма пуҫланӑ.
Никольский проспектӗнчен Энтузиастсен урамне пӑрӑннӑ чухне Т567ТТ 21 номерлӗ «Ауди» автомобиль сулахай енне ҫул-йӗр правилине пӑсса пӑрӑнма тӑнӑ. «Киа-Рио» водителӗ ӑна ҫул паман.
Ҫавӑн хыҫҫӑн «Ауди» ҫамӑл машина хӑйне «кӳрентернӗ» машина умне сиксе тухнӑ, унтан водитель патне пырса темиҫе хутчен ҫапнӑ. Пӑтӑрмах вырӑнне йӗрке хуралҫисене чӗнме тивнӗ. Усал водитель вӗсемпе те пуҫтахла тытнӑ.
Виҫӗмкун, ҫурла уйӑхӗн 7-мӗшӗнче, Шупашкарта йӗрке хуралҫисем шурӑ тӗслӗ «Хендай Солярис» автомобиле хӑваланӑ.
Машинӑна ирхи 6 сехетре Октябре 50 ҫул урамра ҫул-йӗр инспекторӗсем чарӑнма ыйтнӑ. Вӑл вара тарма пикеннӗ. Ҫав вӑхӑтра светофорӑн хӗрлӗ ҫутине те пӑхӑнман, кӗрсе кайма юраман йӗр ӳкерсе хунине те пӑхса тӑман. База проездӗнче инспекторсем машинӑна хӑваласа ҫитсе чарса лартнӑ-лартнах. Машинӑран тухма килӗшменрен йӗрке хуралҫисен чӳрече кантӑкне ватма тивнӗ.
Водителе ӳсӗрле руль умне ларнӑшӑн унччен правасӑр хӑварнӑ иккен. Водитель правине вӑл ҫӗнӗрен илме экзамен тытман.
Пӑтӑрмах хыҫҫӑн пуҫтах водитель тӗлӗшпе йӗрке хуралҫисем 17 протокол ҫырнӑ.
Чӑваш Енӗн Ҫул-йӗр хӑрушсӑрлӑхӗн патшалӑх автоинспекцийӗн управлени пуҫлӑхӗн заместителӗнче — пай пуҫлӑхӗнче тӑрӑшакан Марат Михайлова «Чӑваш Республики умӗнчи тава тивӗҫлӗ ӗҫсемшӗн» орден медалӗпе чысланӑ. Марат Сергеевич — полици полковникӗ. Хушӑва Чӑваш Ен Элтеперӗ Олег Николаев алӑ пуснӑ.
Полицин подполковникне Владимир Петрова вара Чӑваш Республикин Хисеп грамотипе чыслама йышӑннӑ. Владимир Александрович – Чӑваш Енӗн Шалти ӗҫсен министерствин Наркотик ҫаврӑнӑшне тӗрӗслекен управленин «Гром» спецназӗн пайӗн пуҫлӑхӗ.
Паян, кӑрлач уйӑхӗн 10-мӗшӗнче, Шупашкарти Хӗвеллӗ бульварта ҫамрӑк пӗр арҫын машина тапратаймасӑр халтан кайнӑ. ГАЗель патӗнчи арҫынна патрульпе пост службин ӗҫченӗсем асӑрханӑ.
22 ҫулти каччӑ 3 сехет иртсен ӗҫе кайма пуҫтарӑннӑ. Ҫӑкӑр турттаракан машинӑпа ӗҫлекенскер машинӑна сивве пула ниепле те хускатайман, хӑй те шӑнса кӳтме ӗлкӗрнӗ.
Пакунлисем машинӑна тапратма пулӑшнӑ, ҫав вӑхӑтра ҫамрӑк водителе хӑйсен машинине ӑшӑнма кӗртсе лартнӑ. Каччӑ пакунлисене чунтан тав тунӑ.
+19.7 °C